中風的原因百百款，大箍無運動、高血壓糖尿病、膽固醇（tánn-kòo-sûn，通俗講做血油的一種）傷懸窒牢（that-tiâu）血筋、心律不整心內生血角、凝血（gîng-hueh）功能有問題，攏是捷發現的原因。
一般若是血角生佇靜脈（tsīng-me̍h）系統，順血路流轉來心臟，會窒佇肺動脈，但是袂走去腦造成中風。因為心臟的正爿倒爿毋是直接相迵（sio-thàng）。毋過，心臟內的壁若是有破空，生佇靜脈內底的血角，就會軁（nǹg）過破空走去全身軀，造成腦中風的機會就較大矣。
若是破空足大，就像部份的先天先心臟病，細漢囡仔時陣予醫生看，聽筒（thiann-tâng）聽一下，抑是酸素（sàng-sòo）濃度磅（pōng）一下就會發現有問題矣。偏偏有的空足細，足僫（oh）揣。這款佇心房中間的破空就叫做「卵圓空（nn̄g-înn-khang; EN: foramen ovale）」。這个空是出世就佇咧矣，差不多八九成的人會佇一歲進前關起來，但是嘛有一成的人一直到成人期猶未關。平常時袂影響著心臟功能，毋免處理。但是若發生中風，就愛認真揣看覓「卵圓空」敢有可能佮中風有關係，尤其是較少年的（65歲以下）、久長病較少的這个族群。
 |
| 卵圓空的解剖（kái-phòo）結構 |
既然講這空足歹揣，敢有啥物較好的方法會當診斷呢？上標準的是經食道（si̍t-tō）心臟超音波，食道倚佇心臟的後壁，按呢看上清楚。但是做檢查愛像吞胃鏡按呢，共一支超音波探頭對喙吞落去，較無爽快。一般佇胸坎仔（hing-khám-á）做的心臟超音波有機會會當發現，但是受著體型、肺部狀況（tsōng-hóng）無仝，時常會影響著品質，對這款幼屑屑（iù-sut-sut）的物件有可能看袂清楚。
氣泡（khì-pho）心臟超音波佮腦血筋超音波是一種較無侵入（tshim-ji̍p）性的檢查。做超音波進前愛佇手頂注一支軟針，當咧看超音波的時陣，用漉（lo̍k）過的生理鹽水——內底有足濟比針頭較細的氣泡——對軟針注入去。若是佇心臟倒爿抑是腦動脈看著氣泡，就代表講心臟內底有一空予氣泡通過。
正常的氣泡心臟超音波，氣泡干焦佇心臟正爿爾
簡單來講健康的人有卵圓空毋免處理。但是有中風過抑是中風危險較懸的病人，若是發現有卵圓空，就建議愛治療。除了繼續食抗血小板（hiat-sió-pán）佮抗凝血（gîng-hueh）的藥仔以外，閣會當用心導管送窒仔入去共這空窒起來，毋免開刀共心臟拍開。蹛院時間足短，空喙細，干焦半公分，嘛較袂疼。
 |
| 上中央看起來干焦兩个盤仔的物件就是心導管的窒仔 |
