但是有幾款情形，問題可能無遮爾單純：三十歲以下的少年人、對藥仔治療反應無好的嚴重高血壓、突然間衝（tshìng）懸的血壓、高血壓造成心臟／神經／腰子等等器官（khì-kuan）傷害，就應該愛揣看覓敢有可能是次發性（tshù-huat-sìng）高血壓。意思是講有其他器官明顯的原因造成的。包括：腎（sin）動脈狹細、急慢性腎 （腰子）病、睏眠呼吸中止、藥仔的副作用、內分泌（lāi-hun-pì）失調、主動脈狹細。最後這个「主動脈狹細」就是今仔日欲講的主題。
主動脈狹細是一款先天性心臟病，通常是發生佇主動脈弓（king）接著降主動脈的所在。若像一條水管窒牢咧，狹細的頭前壓力會較懸，後壁就較低。這款病有一个特色，磅手的血壓會比跤較懸。這是診斷的一个線索（suànn-soh）。
 |
| （倒）正常的主動脈弓（正）主動脈弓狹細 頂懸是頭的方向，下跤是跤的方向；主動脈瓣下跤是心臟 經過狹細的所在血壓就會降低 |
上蓋嚴重的出世無偌久就會有症頭，下半身血壓傷低，腸仔和腰子無血流，若無趕緊開刀共狹細的所在拍開閣接起來，人就會死去。嘛有可能出世進前佇狹細的所在有一寡細血筋對邊仔踅過，共頭前的血注入去後壁的主動脈，所以細漢時陣無症頭，到大漢才發現。較奇怪的是，就算講已經開刀過，今仔血筋無狹細，高血壓的機會猶原比一般的人較濟。
欲按怎處理這个問題呢？若是佇嬰仔的時陣，應該愛開刀。假使較年紀大漢、體重較重，就會使做心導管囥弓仔。若是有高血壓發生，當然嘛愛食藥仔控制，若無中風的機率會較懸喔。
1mmHg：毫米汞柱（hô-bí hóng-thiāu），壓力（ap-li̍k）單位。幾公厘（kong-lî）懸的汞（hóng）／水銀（tsuí-gîn）對一單位面積（bīn-tsik）造成的壓力。
2代謝症候群（tāi-siā-tsìng-hāu-kûn）：(1) 腹肚大箍：男性腰圍 ≧ 90 cm (35吋)、女性腰圍 ≧ 80 cm (31吋)。(2) 血壓較懸：懸壓 ≧ 130 mmHg 抑是低壓 ≧ 85mmHg，抑是服用醫師處方（tshú-hng）治療高血壓的藥仔。(3) 空腹血糖較高：空腹血糖 ≧ 100 mg/dL，抑是服用醫師處方治療糖尿病的藥仔。(4) 空腹三酸甘油酯（sann-sng-kam-iû-tsí）較高：≧ 150 mg/dL，抑是服用醫師處方降三酸甘油酯的藥仔。(5) 高密度（ko-bi̍t-tōo）脂卵白（tsi-nn̄g-pe̍h）膽固醇（tánn-kòo-sûn）較低：男性 < 40mg/dL、女性 < 50mg/dL。以上五項組成因子，符合三項以上就會使判定是代謝症候群。
【酯】目前教育部字典無收這个字，發音是我臆的，無一定正確。旨發音「tsí」。
