Tī我做小兒心臟科訓練醫師ê時陣，台灣爭取著一个機會，tī阮病院主辦一場國際心導管示範大會。Hit年我猶是菜鳥仔，知影ê無kài濟，kan-na hőng分配去綴其中一台做第二助手。
病人是一个五六十歲ê阿伯，進前動心臟手術（破胸破心）kā二尖瓣換做一粒鐵仔ê。無奈何手術ê時陣，鐵瓣膜hām人體組織紩無bā，致使瓣膜ê邊仔有tsiânn濟破空，會漏血。病人一直有心衰竭（sim-sue-kia̍t）ê症頭，不時仔就會喘。為著這个問題，伊bat接受心導管治療，想beh用窒仔kā破空窒--起來，毋過因為路徑siunn彎曲，致使管仔無法度穿過破空，尾手失敗。
這táu khah特別ê所在，是有邀請真濟國際大師來台灣示範，做主刀醫生，mā趁這个機會hōo逐家交流，互相參詳討論。阮原底ê計畫是：kah心臟外科合作，kā胸坎仔破開，看著心臟以後，順上直ê路線用針tu̍h--入去，按呢穿過破空ê機會上懸。有kā胸坎仔破開，mā毋免驚流血，nā有就用線紩起來就好。
負責阮這台ê是Z大師，伊聽了阮ê計畫就講：毋免外科，我家己來就好。伊請麻醉科hōo已經插管ê病人吐氣了暫停欶氣，hōo肺部kiu起lih上頂懸，看超音波確定倒心室心尖ê所在，就用長koh幼ê針uì胸坎仔tu̍h--入去。台仔頂ê助手kah邊仔ê觀眾lóng毋敢振動。一直到針ê尾溜有鮮紅ê血綴脈搏一陣一陣噴--出來，koh kā一條鐵線成功穿過破空，逐家心肝頭tsiah放khah輕鬆。
問題來--ah。破空窒了，nā是kā管仔挽出來，心臟ê壁就有一空。倒心室內底壓力tsiok大，血會用噴--ê。而且直接uì胸坎仔tu̍h--lueh，內底無可能紩。Z大師真熟手，看伊就用一粒ná像草窒仔ê人工金屬窒仔，拄拄仔好囥tī心室壁內底，bā-bā-bā。隨就解決這个問題。
Hit pái是我到tann唯一pái看過ê針tu̍h心臟。Z大師真正是「老ê老步定」、「刀利毋驚狗頭大」。教科書內底寫ê雄雄出現tī面頭前，hőng看現現。親身經歷過ê就算經過偌濟冬lóng無可能放袂記。
