成人的Fallot四合症

　　五十幾歲的大人，最近一兩冬來感覺體力無好，運動愈來愈喘。雖然生活上無明顯的影響，嘛猶會當𬦰（peh）山，毋過就是感覺佗位怪怪。會佇門診看著伊，是予內科轉過來的，因為佇伊囡仔時陣捌開過心臟，病名叫做Fallot四合症（Fallot sì-ha̍p-tsìng；EN: Tetralogy of Fallot）。

電光片看著展大的心臟

　　先天先心臟病會使按照出世的酸素（sàng-sòo）濃度分做兩類，酸素濃度較低的彼類，因為血內底較濟無捾（kuānn）酸素的血紅素，指頭仔佮喙脣會變做紺（khóng）色，所以號做「發紺（khóng）性」心臟病。Fallot四合症是就是這類其中人數上濟的第一名，佔所有先天先心臟病的十分之一。

 　　Fallot四合症有四个部份：心室中膈缺損（sim-sik-tiong-keh-khuat-sún）、主動脈迒位（tsú-tōng-me̍h hānn-uī）、肺動脈狹細（hì-tōng-me̍h e̍h-sè）、正心室肥大（tsiànn-sim-sik puî-tuā）。細漢時開刀，除了共心室中膈缺損彼空補起來，定定攏會閣共肺動脈瓣附近切開，再用一片人工（jîn-kang）的布紩（thīnn）起來，做一个較大的空間。按呢去肺部的血流較濟，就解決欠酸素的問題。

　　較早以前，手術開到遮就煞（suah）矣，會共病人講你原全（guân-tsuân）矣毋免閣來矣。病人嘛足歡喜。的確（tik-khak），手術過的囡仔大部份活動攏無問題，傱（tsông）來傱去嘛毋捌喘袂過。但是十幾年前毋知影的是：雖然手術解決了狹細的問題，切開的肺動脈瓣顛倒造成嚴重的倒流。倒流久仔，正心室就沓沓（ta̍uh-ta̍uh）仔展大。這个速度足慢，通常十幾二十幾年以後才會予人發覺（huat-kak）。

　　展大的正心室予心臟內底的電線——傳導（thuân-tō）系統——愈搝（giú）愈長，心跳信號對心房到心室的時間嘛愈久，心臟跳起來就會敧敧（khi-khi）無協調（hia̍p-tiau），猶閣較會發生心律不整（sim-lu̍t-put-tsíng），心臟亂跳。正心室足漲的時陣，嘛會硩（teh）著倒爿的倒心室，到這个坎站（khám-tsām）毋若正爿無好，倒爿嘛䆀。

Fallot四合症的大人，心房心室傳導較慢

　　判斷（phuànn-tuàn）換肺動脈瓣的時機，除了一般的心臟超音波、心電圖、電光片以外，心臟磁振造影（tsû-tsín-tsō-iánn）是上重要的檢查，會當詳細計算（kè-sǹg）心室體積（thé-tsik）佮倒流比率（pí-lu̍t）。徛跤踏車的心肺功能檢查也會使有一个較客觀（kheh-kuan）的標準知影這馬的體力佮仝年紀的人比較起來是有精差（tsing-tsha）無。

心臟磁振造影毋若會使看結構，猶會使看功能

　　總講一句，Fallot四合症佇細漢開刀過的病人，毋好袂記得去予小兒心臟科醫師追蹤喔。

藝人的心臟病

　　前一陣仔，藝人（gē-jîn）劉真因為心臟病過身的消息予逐家感覺足意外。新聞內底講：伊因為嚴重的主動脈瓣（tsú-tōng-me̍h-bān）狹細（e̍h-sè）去開刀，毋過無疑悟（bô-gî-ngōo）出代誌。雖然經過急救，嘛裝過咱定定笑詼講是上厲害的葉（ia̍p）醫師的ECMO¹佮倒心室輔助器（hú-tsōo-khì），想欲等換心。無奈等待（thāi）過程發生腦出血，最後無法度過這个劫數（kiap-sòo）。

　　劉真佮我是讀仝高中（師大附中），會當講是我的學姊，大我足濟屆。我猶是高中生的時陣，伊就已經佇演藝界蓋出名矣。這毋是重點。重點是伊的病嘛是一款先天先心臟病！佮我的小兒心臟科有關係喔！你講唅（hannh），你共我騙？伊遐爾仔大漢矣（40幾歲），哪有可能是先天性的？

　　伊的這款病確實是先天性的，病名叫做「兩葉主動脈瓣（nn̄g-hio̍h-tsú-tōng-me̍h-bān）²」。一般人主動脈是三瓣，𪜶（in）干焦有兩瓣。本來三瓣的主動脈瓣，其中兩瓣黏做伙，毋若袂當完全拍開，也關袂絚（ân）。所以造成主動脈狹細佮倒流。

　　下跤兩个影片攏是用超音波對無仝方向看一个拄出世嬰仔的心臟有兩葉主動脈瓣：

主動脈瓣袂完全拍開，看起來若像一个吊床

正常的主動脈瓣 （三葉）應該像一个BENZ商標，伊其中兩葉無分開

　　有人嘛會問講：既然是先天性的，為啥物細漢時陣無處理，到遮爾仔大漢，已經結婚生囝了後才來動手術？其實，兩葉主動脈瓣的嚴重程度會慢慢仔變化。佇拄出世的嬰仔雖然就會看著伊的瓣膜（bān-mo̍oh）無正常，但是通常無蓋厲害。年歲愈大，狹細佮倒流的狀況（tsōng-hóng）嘛會愈嚴重。囡仔時陣若是瓣膜傷狹需要治療，只要無明顯的倒流，一般攏先考慮做心導管（sim-tō-kuán），用雞胿（ke-kui）共弓開（king--khui），希望會當延延 （iân-tshiân）換瓣膜的時間。

　　假使心導管無效果，抑是倒流傷嚴重，就愛開刀破胸 （phuà-hing）換一个人工（jîn-kang）的。最近上新的治療方式是用心導管換人工瓣膜，一个紩（thīnn）佇血筋弓仔頂懸的瓣對骱邊（kái-pinn）的大血筋送入去心臟內底，按呢空喙誠細，恢復（khue-ho̍k）嘛較緊，毋過這馬是建議用佇年歲較大久長病較濟的序大人，因為𪜶（in）開刀的風險傷大。

　　下跤的影片是五十幾歲大人嚴重的主動脈狹細佮倒流：

註（tsù）：
1. ECMO全名是體外膜氧合器（thé-guā-mo̍oh-ióng-ha̍p-khì; EN: extracorporeal membrane oxygenation），伊的功能是暫時代替人的心臟佮肺。按照插入管仔的位無仝，會用分做「靜脈到動脈」佮「靜脈到靜脈」兩種，各別用佇心肺佮肺臟衰弱（sue-jio̍k），當別項治療，譬如講強心劑（kiông-sim-tse）、呼吸（hoo-khip）器攏用到盡磅（tsīn-pōng）矣，就是出動葉醫師的時機。不過，上重要一定愛會記得一項代誌：「ECMO干焦會當拖時間，毋是咧解決本底的疾病（tsik-pēnn）。」猶閣伊的併發症（pìng-huat-tsìng）嘛袂少，親像腦中風、腦出血、血筋窒牢（that-tiâu）、細菌（sè-khún）感染、跤手烏去焦去攏有可能。若是無法度治療的過症，千萬毋通來裝ECMO，毋若袂好，狀況（tsōng-hóng）閣會愈來愈䆀。
2. 兩葉主動脈瓣，英語叫做「bicuspid aortic valve」。