為著欲解決伊的問題，一寡心臟的檢查嘛攏做過矣，結果攏正常。這个時陣，醫師用手揤（tshi̍h）伊的腹肚，差不多比肚臍較懸的所在，伊隨喝講會疼。閣斟酌問一下，伊的疼定定是佇胸坎仔中央，食飽了運動了攏會較嚴重，猶有火燒心的症頭。進前厝裡捌有人胃出問題做過胃鏡。
按呢看起來診斷上成（sîng）是溢刺酸（ik-tshiah-sng）。一般足濟人誤會這干焦是成人的病，毋閣少年人有溢刺酸的誠實（tsiânn-si̍t）無蓋少。當胃酸倒流起去（khí--khì）食道（si̍t-tō），因為胃倚（uá）佇胸坎仔下跤，食道䖙（the）佇心臟後面，胃疼抑是食道疼，佮胸坎仔／心臟疼就分袂清楚。上嚴重的人甚至（sīm-tsì）會感覺嚨喉有酸酸的物件溢出來。
除了食胃藥仔治療以外，調整生活習慣嘛仝款重要。三頓愛照起工（tsiàu-khí-kang），毋好食傷飽，拄食飽莫做激烈（kik-lia̍t）運動。若是懷疑有胃潰瘍（uī-khuì-iông）、十二指腸（si̍p-jī-tsí-tn̂g）潰瘍，就愛考慮做胃鏡檢查。
兒童佮青少年胸坎仔疼，無到百分之五真正是心臟出問題。骨頭筋肉問題、肺部問題（比如：痚呴[he-ku]、肺炎[hì-iām]）、消化道問題，攏比心臟較濟。但是若有先天性心臟病、川崎症（tshuan-kiā-tsìng／kha-uah-sá-khih-tsìng／英語Kawasaki disease）病史，抑是運動當中昏倒毋知人，危險就較大，一定愛提醒（thê-tshénn）醫師注意。
