國際無拍囡仔日

　　四月三十號是國際無拍[1]囡仔日。有人聽著就講「曷[2]無前一工先拍拍咧」、「千萬毋通予囡仔知影這个日子」、「好佳哉干焦一工爾爾[3]」。當然這攏是講耍笑。

[1]拍phah [2]曷a̍h [3]爾爾niā-niā

　　四月三十號是國際不打小孩日。有人聽到就說「啊不然前一天先打」、「千萬不可以讓小孩知道這個日子」、「還好只有一天而已」。當然這些都是說笑。

　　認真講，我完全同意欲教囡仔袂當用拍的。我到今仔毋捌[1]拍過囡仔，我本人囡仔時陣嘛毋捌予爸母拍過。以個人的經驗[2]提供[3]幾項原則[4]予逐家做參考：

[1]捌bat [2]經驗king-giām [3]提供thê-kiong [4]原則guân-tsik

　　認真說，我完全同意要教小孩不能用打得。我到現在沒有打過小孩，我本人兒童時期也沒被爸媽打過。以個人的經驗提供幾項原則給大家參考：

1. 以身作則[1]：若是爸母規工咧掰[2]手機仔，翻頭[3]喝[4]囡仔袂使閣看平板[5]電腦，按呢絕對無效。我若佇厝裡顧囡仔，絕對共手機仔囥甲遠遠遠。除非有啥物要緊的代誌愛聯絡，無就袂共開開[6]。若無愛囡仔食四秀仔[7]，大人嘛袂使（佇in面頭前）食。
2. 堅定[8]：要求囡仔做伊毋願意做的代誌，愛比伊較堅定。有幾若擺查某囝𨑨迌物仔[9]烏白擲佇塗跤，抑是耍了無收，我叫伊愛抾起來、收起來，上頭伊毋願就是毋願，我絕對袂妥協[10]，毋免歹聲嗽，但是毋管是二十分鐘抑是三十分鐘，我一定會念到伊去做。有做的時陣嘛愛共伊呵咾，予伊感覺足歡喜。一站仔以後，伊就家己講這𨑨迌物仔愛收，彼嘛愛收，無收猶袂使。
3. 原則清楚：足濟囡仔攏無愛乖乖仔食飯，那食那耍，大人佇後壁逐[11]，拜託伊食飯。這絕對袂佇阮厝裡發生。自囡仔四五個月開始，食物件（牛奶以外）就是愛坐佇椅仔頂，若落來就無物件食，欲食就愛坐倒轉去。若是伊講食飽無欲食當然嘛袂勉強伊。
4. 正向[12]講話：若是干焦講袂使按怎，囡仔猶無啥了解伊佗位做毋著，後回應該按怎做。佇咧講in做毋著的時陣，嘛愛講會使按怎做。舉例來講，講袂使佇椅仔頂跳，嘛愛講佇佗位才會當跳。物件袂使用擲的，應該是愛按怎輕輕仔好禮仔囥。
5. 控制[13]情緒[14]：囡仔做毋著代誌，若是伊知影大人受氣的道理會失禮矣，就莫閣氣怫怫[15]。上久隔工嘛愛心平氣和[16]，毋好逐工咧算舊數[17]。 

[1]以身作則í-sin-tsok-tsik [2]掰pué [3]翻頭huan-thâu [4]喝huah [5]平板pênn-pán [6]開開khui--khui [7]四秀仔sì-siù-á [8]堅定kian-tīng [9]𨑨迌物仔tshit-thô-mih-á [10]妥協thò-hia̍p [11]逐jiok [12]正向tsiànn-hiòng [13]控制khòng-tsè [14]情緒tsîng-sū [15]氣怫怫khì-phut-phut [16]心平氣和sim-pîng-khì-hô [17]算舊數sǹg kū-siàu

1. 以身作則：若是爸媽每天在滑手機，轉頭喊小孩不可以再看平板電腦，這樣絕對無效。我如果在家裡顧小孩，絕對把手機放得非常遠。除非有什麼緊急的事情要聯絡，不然絕對不會開啟，如果不要小孩吃零食，大人也不可以（在他們面前）吃。
2. 堅定：要求小孩做他不願意做的事情，要比他更堅定。有幾次女兒玩具隨便丟在地上，或是玩過沒收，我叫她撿起來、收起來，剛開始她不願意就是不願意，我絕對不妥協，不用口氣很差，但是不管二十分鐘或三十分鐘，我一定念到他去做。有做到的時候也要褒獎他，讓他覺得很開心。一陣子以後，他就自己說這個玩具也要收，那個也要收，沒收還不行。
3. 原則清楚：很多小孩都不乖乖吃飯，一邊吃一邊玩，大人在後面追，拜託他吃飯，這絕對不會在我們家發生。自從小孩四五個月開始，吃東西（除了牛奶外）都要坐在椅子上，如果下來就沒東西吃，想吃就要坐回去。如果她說吃飽了不想吃當然也不勉強。
4. 正向講話：如果只說不能怎樣，小孩可能還不了解他什麼地方做錯，下次應該要怎麼做。在說他們什麼地方做錯的同時，也要說可以怎麼做。舉例來說，說不能在椅子上跳，也要說可以在哪裡跳。東西不能用丟的，應該要怎樣輕輕地放。
5. 控制情緒：小孩做錯事情，如果他知道大人生氣的原因道歉了，就不要再氣呼呼了。最久隔天也要心平氣和，不要每天都在翻舊帳。

　　拍囡仔干焦會製造驚惶[1]，毋是有效果的教育。以後囡仔大漢精神問題會較濟，後一代嘛會重複[2]仝款的暴力[3]。希望咱的囡仔攏是佇充滿[4]愛（佮母語）的環境[5]大漢。

[1]驚惶kiann-hiânn [2]重複tiông-ho̍k [3]暴力pō/po̍k-li̍k [4]充滿tshiong-buán [5]環境khuân-kíng

　　打小孩只會製造恐懼，不是有效果的教育。以後小孩長大精神問題會比較多，下一代也會重複一樣的暴力。希望我們的小孩都是在充滿愛（和母語）的環境長大。

預防注射的簿仔

　　每一个囡仔攏有一本足重要的簿仔[1]，華語叫做《兒童[2]健康手冊[3]》，內底記錄出世的資料、身懸[4]體重頭圍[5]的變化，閣較重要的是注預防射[6]的記錄。規本簿仔的內容，攏囥佇國健署[7]的網路[8]頂懸，線頂[9]就會用下載[10]落來。這个名佇台語念起來有小寡仔礙虐[11]，我先大主大意[12]共伊號做《囡仔健康簿仔》。

[1]簿仔phōo-á [2]兒童jî-tông [3]手冊tshiú-tsheh [4]身懸sin-kuân [5]頭圍thâu-uî [6]注預防射tsù ī-hông-siā [7]國健署kok-kiān-sú [8]網路bāng-lōo [9]線頂suànn-tíng [10]下載hā-tsài [11]礙虐gāi-gio̍h [12]大主大意tuā-tsú-tuā-ì

　　每一個小孩都有一本很重要的本子，華語叫做《兒童健康手冊》，裡面紀錄出生的資料、身高體重頭圍的變化，更重要的是預防注射的紀錄。整本本子的內容，都放在國健署的網路上，線上就可以下載下來。這個名字在台語念起來有一點怪，我先自作主張把它叫作《囡仔健康簿仔》。

國健署網站

華語版 https://www.hpa.gov.tw/Pages/EBook.aspx?nodeid=1139

其他語言 https://www.hpa.gov.tw/Pages/TopicList.aspx?nodeid=1140

　　若是點入去就會感覺足「趣味」。其他語言內底，毋但[1]英語，連泰語[2]、柬埔寨語[3]、印尼語[4]、越南語[5]攏有（為著毋捌華語的新住民）。顛倒是同齊[6]列入[7]國家語言的台語、客語、原住民語，竟然低人一等，啥攏無。

[1]毋但m̄-nā [2]泰語thài-gí [3]柬埔寨kán-poo-tsē [4]印尼語ìn-nî-gí [5]越南語ua̍t-lâm-gí [6]同齊tâng-tsê [7]列入lia̍t-ji̍p

　　如果點進去就會感覺很「有趣」。其他語言裡面，不只有英語，連泰語、柬埔寨語、印尼語、越南語都有（為了不會華語的新住民）。反倒是一起列入國家語言的台語、客語、原住民語，竟然低人一等，什麼都沒有。

　　兩年前，我捌寫電子批予署長，希望in會當出本土語言版。彼陣，in的回覆[1]是按呢（翻做台語）：「林醫師你好：你寫予本署署長的電子批，本署誠重視[2]，感謝你對囡仔健康的關心佮囡仔健康簿仔內容的肯定[3]，有關[4]你提出可能有民間兒科醫護人員會當鬥翻譯本土語言（台語、客語、原住民語）的囡仔健康簿仔，考慮著部份預防射名稱[5]抑是醫療專業用詞較僫[6]翻譯做本土語言，為避免部份家長認知[7]誤解[8]，請你提供會當協助[9]翻譯本土語言的醫護人員名單抑是相關單位，本署將另行徵詢[10]兒科醫學會意見佮收集相關資料以後，錄案研處[11]。」

[1]回覆huê-ho̍k [2]重視tiōng-sī [3]肯定khíng-tīng [4]有關iú-kuan [5]名稱bîng-tshing [6]僫oh [7]認知jīn-ti [8]誤解gōo-kái [9]協助hia̍p-tsōo [10]徵詢tin-sûn [11]錄案研處lo̍k àn gián tshú

　　兩年前，我有寫電子信給署長，希望他們可以出本土語言板。那時候，他們的回覆是這樣（翻作台語）：「林醫生您好：您致本署署長信箱電子之郵件，本署非常重視，感謝您對兒童健康的關心及對兒童健康手冊內容的肯定，有關您所提或有民間兒科醫護人員可協助翻譯本土語言（台語、客語、原住民語）之兒童健康手冊，考量部分疫苗名稱或醫療專業用詞恐不易完整翻譯為本土語言，為避免部分家長認知誤解，惠請您提供可協助翻譯本土語言之醫護人員名單或相關單位，本署將另行徵詢兒科醫學會意見及收集相關資料後，錄案研處。」

　　我照伊批後壁徛名[1]的電話敲過去。負責人問我敢知影有啥人抑是佗位會當鬥相共[2]。我講台語我會使，其他語我就毋捌。伊講按呢喔，原住民語有十幾个，毋知影欲去佗位揣人。尾仔講彼陣簿仔欲出新版矣，改版的時陣若是有需要會閣共我聯絡。

[1]徛名khiā-miâ [2]鬥相共tàu-sann-kāng

　　我照他信後面署名的電話打過去。負責人問我是否知道有誰或是哪裡可以幫忙。我說台語我可以，其他語言我就不知道了。他說這樣喔，原住民語有十幾個，不知道去哪裡找人。最後說那時候手冊將要出新版了，改版的時候如果有需要會再跟我聯絡。

　　當然一如預期[1]，紲落[2]就無影無跡。揣著人敢有遐爾困難，干焦[3]無想欲做爾。今仔日想著這層代誌，規氣[4]家己共簿仔內底注射彼部份改做台語版的。

[1]預期ī-kî [2]紲落suà-lo̍h [3]干焦kan-na [4]規氣kui-khì

　　當然一如預期，之後就沒消息了。找到人哪有這麼困難，只是不想做而已。今天想到這件事情，乾脆自己把手冊裡預防注射那部分改成台語版的。

頂頭的PDF檔案佇遮下載

　　預防射有分兩種：死的佮活的。死的是干焦病原[1]的一部份，嘛有可能是共細菌病毒刣[2]死以後，成做預防射。活的是共細菌抑是病毒經過減毒處理當做預防射。一般活的佮活的兩種預防射兩針之間愛隔上少28工，死的就無要求。

[1]病原pēnn-guân [2]刣thâi

　　疫苗有兩種：死的和活的。死的是只有病原的一部份，也有可能是把細菌病毒殺死之後，做成疫苗。活的是把細菌或是病毒經過減毒處理當作疫苗。一般活的和活的兩種疫苗兩針之間要間隔至少28天，死的就沒有要求。

憂頭結面的苦先生

 　　第一擺拄著苦先生，是我猶佇總院做研究醫師訓練小兒心臟科的時陣。伊佇雲林成人的心臟科發現心房中央有一个足大的破空，轉過來台北予我的老師王教授治療。

　　第一次遇到許先生，是我還在總院當研究醫師訓練小兒心臟科的時候。他在雲林成人的心臟科發現心房中央有一個很大的破洞，轉過來台北給我的老師王教授治療。

　　做心導管的前一工，我照例對病房共伊叫來檢查心臟超音波，斟酌[1]共彼空的形狀、所在、四箍圍仔[2]的結構攏看予詳細。黃昏[3]的討論會愛共老師報告。除了這，閣看伊入院抽血的結果。

[1]斟酌tsim-tsiok [2]四箍圍仔sì-khoo-uî-á [3]黃昏hông-hun

　　做心導管的前一天，我照例從病房叫他來檢查心臟超音波，仔細把那個洞的形狀、位置、四周圍的結構都看清楚。黃昏的討論會要向老師報告。除了這些，也看他入院抽血的結果。

　　「苦先生，你血紅素[1]傷低呢！莫怪你有淡薄仔喘。按呢明仔載手術進前應該愛注血喔。」

[1]血紅素hueh-âng-sòo

　　「許先生，你血紅素太低喔！難怪你有點喘。這樣明天手術之前應該要輸血喔。」

　　伊佇幾若年前因為傷大箍[1]，有開刀共大部份的胃攏切掉，欠血應該是佮這有關係。一寡仔維生素[2]無法度對胃吸收，所致[3]製造血的原料鐵質欠缺[4]，血紅素才做袂出來。小問伊彼陣開刀的情形，伊的興頭就來矣。

[1]大箍tuā-khoo [2]維生素uî-sing-sòo [3]所致sóo-tì [4]欠缺khiàm-khuat

　　他在幾年前因為太胖，開刀切掉胃的大部分，貧血應該和這有關係。有一些維生素無法從胃吸收，所以造成製造血的原料鐵質欠缺，血紅素才做不出來。稍微問他那陣子開刀的情形，他的興致就來了。

　　「我佇雲林是一个李醫師共我開的啦。伊人真好，看起來緣投閣斯文，患者足濟，這馬已經轉來台北矣。恁少年醫師就愛佮伊仝款，患者嘛才會濟。」

　　「我在雲林是一位李醫師幫我開的啦。他人很好，看起來英俊又斯文，病患很多，現在已經回來台北了。你們年輕醫師就要跟他一樣，病患才會多。」

　　「我拄好今年中訓練結束嘛會去雲林呢。」

　　「我正好今年中訓練結束也會去雲林呢。」

　　「按呢喔，我看你的名。」伊越頭過來共我醫師袍的名瞭[1]一下。

[1]瞭lió

　　「這樣喔，我看你的名字」他轉頭過來瞄一眼我的醫師袍。

　　隔工手術前，佇心導管室，我問伊昨昏[1]暗敢好睏？

[1]昨昏tsa-hng/tsa̋ng

　　隔天手術前，在心導管室，我問他昨天晚上睡得好嗎？

　　「注血了我感覺從來無遮爾爽快過，精神攏轉來矣。」

　　「書寫之後我感覺從來沒有這麼爽快過，精神都回來了。」

　　問伊敢會煩惱？

　　問他會擔心嗎？

　　「我是袂驚死啦，但是我足驚疼。恁針是偌大枝？敢會足恐怖？」

 　　「我是不會怕死啦，但是我很怕痛。你們針是多大枝？會不會很恐怖？」

　　敢袂傷譀[1]？雖然已經欲五十歲矣，伊講話就是按呢，予人一下聽著，毋知影是袂共伊安搭[2]、呵咾[3]，抑是欲反白睚[4]。無定著，二十年前伊是gâu詼[5]姼仔[6]的飄撇[7]少年兄。過兩工心導管做了就順利出院矣。

[1]譀hàm [2]安搭an-tah [3]呵咾o-ló [4]反白睚píng pe̍h-kâinn [5]詼khue [6]姼仔tshit-á [7]飄撇phiau-phiat

　　會不會太誇張？雖然已經快五十歲了，他講話就是這樣，讓人一聽到，不知道應該安慰他、誇獎他、還是要翻白眼。該不會，二十年前他是追女朋友開女生玩笑很厲害的少年。過兩天心導管做好就順利出院了。

　　去雲林做主治醫師以後，佇門診閣拄著伊來追蹤。心臟明明就好勢好勢，但是伊一直講人siān-siān無爽快、無活力、會喘。上頭的確發現伊欠血的毛病又閣來矣，共伊注血，嘛開鐵劑佮維生素補充。

　　去雲林當主治醫師以後，在門診又遇到他來追蹤。心臟明明就很好，但是他一直說人很累不舒服、沒活力、會喘。最初的確發現他貧血的毛病又來了，讓他輸血，也開鐵劑和維生素補充。

　　後來抽血攏無欠血矣，毋過伊感覺效果無啥好。逐擺轉來門診攏是憂頭結面[1]，問我會當閣注血無？我講抽血無看著欠血就袂當注，伊番佮強欲冤起來。等伊較冷靜落來，我才了解in厝裡最近有幾个序大人當咧破病，足需要人共照顧。翁仔某兩人無閒刺刺[2]，操煩佮家己嘛欲著病矣。

[1]憂頭結面iu-thâu-kat-bīn [2]無閒刺刺bô-îng-tshì-tshì

　　之後抽血就都沒有貧血了，不過他感覺效果不怎麼好。每次回來門診都是苦瓜臉，問我可以再輸血嗎？我說抽血沒看到貧血就不能輸，他不講理到差點吵起來。等他比較冷靜了，我才了解他們家裡最近有幾個長輩正在生病，非常需要人照顧。夫妻兩人非常忙碌，煩惱到自己也要生病了。

　　我治心臟病無問題，治心理病就無法度。再三[1]共伊吩咐[2]心臟佮欠血的代誌，閣建議若真正問題足嚴重就愛去揣精神科醫師諮詢[3]。約伊如期[4]半年以後轉來做超音波追蹤。

[1]再三tsài-sann [2]吩咐huan-hù [3]諮詢tsu-sûn [4]如期jû-kî

　　我治療心臟病沒有問題，治療心理疾病就沒辦法了。再三向他叮嚀心臟和貧血的事情。又建議如果真的問題很嚴重就要去找精神科醫師諮詢。約他照例半年以後回來接受超音波追蹤。

　　半年以後拄著伊。欸，本來小寡大箍哪會瘦落來矣，精神猶袂䆀。做了超音波，伊共我講：「我本來足鬱卒的，想講我心臟無好，出門用全身軀的氣力去走，走走咧應該就會死去。想袂到，一直走一直走，愈走愈遠，突然間感覺按呢袂䆀，就定定去運動。規身人就瘦落來嘛較快活[1]矣。我這馬有法度走半馬[2]喔。」

[1]快活khuìnn-ua̍h [2]半馬puànn-má

　　半年以後遇到他。欸，本來有點胖怎麼會瘦下來了，精神還不錯。做完超音波，他跟我說：「我本來非常鬱卒，想說我心臟不好，出門用全身的力氣跑步，跑一跑應該就會死掉。想不到，一直跑一直跑，愈跑愈遠，突然間感覺這樣不錯，就一直去運動。整個人就這樣瘦下來也比較舒服了。我現在有辦法跑半馬喔。」

　　後來伊就無閣轉來我的門診矣。

七百幾克的紅嬰仔

 　　救護車送來一个早產[1]的查某紅嬰仔[2]來做加護病房的厝跤[3]，距離夠月[4]猶有四個外月，細隻甲。伊的阿母有身24禮拜，佇厝裡感覺腹肚疼，緊傱[5]去婦產科診所。診所無法度處理，隨閣叫救護車共伊送過來。無疑悟[6]，原仔[7]袂赴[8]，猶袂到病院囡仔就雄雄生佇車頂。一个極度[9]早產的嬰仔就按呢規路幌[10]咧幌咧遊覽[11]雲林半點鐘才到病院。

[1]早產tsá-sán [2]嬰仔enn-á [3]厝跤tshù-kha [4]夠月kàu-gue̍h [5]傱tsông [6]無疑悟bô-gî-ngōo [7]原仔uân-á [8]赴hù [9]極度ki̍k-tōo [10]幌hàinn [11]遊覽iû-lám

　　救護車送來一個早產的女嬰來加護病房當房客，距離足月還有四個多月，很小隻。他媽媽懷孕24週，在家裡感覺肚子痛，趕緊衝到婦產科診所。診所沒辦法處理，立刻再叫救護車送他過來。沒想到，仍然趕不及，還沒到醫院小孩就突然生在車上。一個極度早產的嬰兒就這樣一路晃啊晃啊遊覽雲林半個小時才到醫院。

　　護理師[1]共伊磅[2]體重，干焦[3]七百外克[4]。阮遮規氣[5]共伊號一个偏名[6]「七的（tshit--ê）」。伊的人生上頭，就拄著大風大湧[7]。因為肺部發育[8]猶未完全，有插管治療一站仔[9]。一禮拜大左右腸仔發炎[10]破去，腹肚脹甲規个烏趖趖[11]膨獅獅[12]，本來攏準備好勢予伊轉院去開刀破腹[13]。想袂到，抗生素[14]干焦注兩三工，家己就好去矣。了後就一切順利，沓沓仔[15]食奶大漢。逐家la天[16]的時陣咧笑講，路邊的圓仔花，家己知影環境䆀[17]，顛倒較巴結[18]。

[1]護理師hōo-lí-su [2]磅pōng [3]干焦kan-na [4]克khik [5]規氣kui-khì [6]偏名phian-miâ [7]湧íng [8]發育huat-io̍k [9]一站仔tsi̍t-tsām-á [10]發炎huat-iām [11]烏趖趖oo-sô-sô [12]膨獅獅phòng-sai-sai [13]破腹phuà-pak [14]抗生素khòng-sing-sòo [15]沓沓仔ta̍uh-ta̍uh-á [16]la-thian [17]䆀bái [18]巴結pa-kiat

　　護理師量他的體重，才七百多克。我們這裡乾脆給他取一個綽號「小七」。他的人生最初，就遇到大風大浪。因為肺部發育還不完全，有插管治療一陣子。一個禮拜大左右腸子發炎破掉，肚子脹地整個很黑很撐，本來都準備好讓她轉院去開刀剖腹。沒想到，抗生素才打兩三天，自己就好起來了。之後就一切順利，慢慢吃奶長大。大家聊天的時候在笑說，路旁的千日紅，自己知道環境不好，反而比較堅強。

　　比身體的毛病閣較予人煩惱[1]的，是伊的家庭。爸母攏足少年嘛無結婚，阿母自出院了就消失去矣。見擺[2]囡仔有狀況[3]欲揣伊，敲電話定定袂通。總算久久仔來病院開會，少年阿爸規場頭犁犁[4]咧掰[5]手機仔，阿母毋知是聽有抑是聽無，阿公坐佇邊仔看起來足無奈何。In表達想欲予人收養[6]這个查某囝。

[1]煩惱huân-ló [2]見擺kiàn-pái [3]狀況tsōng-hóng [4]犁犁lê-lê [5]掰pué [6]收養siu-ióng

　　比身體的問題還讓人煩惱的，是他的家庭。爸媽都很年輕也沒結婚，媽媽從出院之後就消失了。每次小孩有狀況要找他，打電話常常不通。總算過很久來到醫院開會，年輕的爸爸整場頭低低在滑手機，媽媽不知道是有聽懂還是沒聽懂，阿公坐在旁邊看起來非常無奈。他們表達想要讓人收養這個女孩。

　　早產兒的發展[1]較慢，出院以後，猶愛定期追蹤[2]看門診，不止仔麻煩。經過社工的安排，送去新北市的寄養[3]家庭。有一擺我去總院，佇超音波[4]室外口搪[5]著伊坐奶母車[6]來做檢查，看起來好勢好勢，飼甲肨奶[7]肨奶。紲落[8]就無伊的消息。

[1]發展huat-tián [2]追蹤tui-tsong [3]寄養kì-ióng [4]超音波tshiau-im-pho [5]搪tn̄g [6]奶母車ni-bú-tshia [7]肨奶hàng-ling [8]紲落suà-lo̍h

　　早產兒的發展比較慢，出院以後，還要定期追蹤看門診，非常麻煩。經過社工的安排，送去新北市的寄養家庭。有一次我去總院，在超音波室外面遇到他坐嬰兒推車來做檢查，看起來很好，養得有點嬰兒肥。之後就沒他的消息。

　　差不多兩冬以後，我雄雄佇門診的掛號名單看著伊的名。本底想講是菜市仔名嘛無啥稀罕[1]，毋閣伊的年歲拄好。護理師叫著伊的號碼，行入來的是三个阿啄仔[2]𤆬[3]兩个細漢查某囡仔。其中一个用華語共我解說[4]，這對翁仔某是對荷蘭[5]來的，兩个囡仔是in的契[6]查某囝，其中一个就是我進前的早產病人七的，另外一个較大漢的嘛是對台灣收養過去的。七的驚生份[7]，看起來有一點仔閉思[8]，已經會曉行路佮講話。養爸母講，in收養七的，和伊做伙蹛荷蘭生活一陣矣。這逝[9]刁工[10]𤆬伊轉來台灣，是想欲搜揣[11]記錄伊嬰仔時期的故事，予伊未來有一工問著出世的所在會當講予伊聽。

[1]稀罕hi-hán [2]阿啄仔a-tok-á [3]𤆬tshuā [4]解說kái-sueh [5]荷蘭hô-lân [6]契khè [7]生份tshenn-hūn [8]閉思pì-sù [9]逝tsuā [10]刁工thiau-kang [11]搜揣tshiau-tshuē

　　差不多兩年以後，我忽然在門診的掛號名單看到他的名字。本來想說這是菜市場名不怎麼稀奇，不過他的年紀正好。護理師叫到他的號碼，走進來的是三個西方外國人帶兩個小女孩。其中一個用華語向我解釋，這對夫妻是從荷蘭來的，兩個小孩是他們的養女，其中一個就是我之前的早產病人小七，另外一個年紀比較大的也是從台灣收養過去的。小七很怕生，看起來有一點害羞，已經會走路和講話。養父母說，他們收養小七，和他一起住在荷蘭生活已經有一陣子了。這次特別帶他會來台灣，是想要尋找記錄他嬰兒時期的故事，讓他未來有一天問到出生的地方可以說給他聽。

　　In的心意予人足感動，除了親身解說，我閣敲[1]電話去新生兒[2]加護病房安排in去佮護理師見面，因為護理師才是照顧伊上久、了解伊上深的人。In嘛有攢[3]一寡仔[4]過鹹水來的食食[5]送予阮，包括荷蘭上出名的格仔脆餅[6]（stroopwafel），猶有足「特殊[7]」口味的甘草[8]糖、花椒[9]糖，試過以後逐家攏叫毋敢[10]。

[1]敲khà [2]新生兒sin-sing-jî [3]攢tshuân [4]一寡仔tsi̍t-kuá-á [5]食食tsia̍h-si̍t [6]格仔脆餅keh-á-tshè-piánn [7]特殊ti̍k-sû [8]甘草kam-tshó [9]花椒hue-tsio [10]毋敢m̄ kánn

　　他們的心意讓人很感動，除了親自解說，我也打電話到新生兒加護病房安排他們去跟護理師見面，因為護理師才是照顧他最久、了解他最深的人。他們也有帶一些過海來的小吃送給我們，包括荷蘭最有名的鬆餅（威化餅），還有很「特殊」口味的甘草糖、花椒糖，試過以後大家都不敢再吃了。