台羅ê kha̋ng-páng

　　Tsa̋ng佇虎尾予朋友請食薑母鴨，仝一桌坐邊仔--ê是一个家醫科醫師，煞場ê時陣阮嘛做伙行去開車。行--leh行--leh，就影著路邊一間手摵飲料店ê kha̋ng-páng寫「KUÓ-Ì」，我就共伊講這若像是leh寫台文拼音ê款，猶毋閣唸出來毋知影leh講啥。

　　伊講台文拼音若像是天書。我隨講袂--ah，我最近去考教育部ê台語檢定有過neh。伊看起來足驚疑，問我是毋是本底就台語足gâu。我就隨轉做台語，講其實三年前我台語足袂輾轉。是因為驚台語欲失傳--ah，才下決心一定愛共家己ê母語講倒轉來，而且kah囡仔（這馬兩歲）是全台語講話。

　　伊有淡薄仔憢疑ê問我，囡仔兩歲台語足輾轉？我講這哪有啥物好奇怪--ê，你對伊講啥伊就講啥，擲伊去彼个環境，偌困難ê語攏毋是問題。兩歲囡仔會曉講華語（只要有人對伊講）就仝款會曉講台語。

　　閣有講超過十分鐘，嘛解說台語羅馬字就是若像學華語愛學注音，這是上基本--ê，才會予你查字典kah書寫ê能力。最後，伊講本來伊對台語羅馬字足排斥--ê，經過我講，感覺會當去學看覓。

　　希望是會當閣減一个母語青盲牛（文盲）。

高鐵坐邊仔ê阿伯

　　我坐高鐵對雲林轉來，邊仔坐一个生份ê阿伯，仝款對雲林上車。佇路中伊提伊ê手機仔共我問：「你看遮冷氣ê防塵蓋寫$290是台票抑是美金？」我斟酌看--一下，共講：「這應該是台票--lah，若是美金就足貴--ooh。」過一站仔，伊閣問：「Ah這leh？寫$95.6是台票抑是美金？」我講：「台票--lah，美金就一領褲3000箍--neh。」伊講：「佇網路買物件--hooh，這少年仔才會曉，阮老歲仔毋捌--lah。」

　　我看伊攏講台語，嘛感覺伊趣味趣味，就共問：「你敢雲林人？」伊講：「你哪會知影？我是東勢彼爿ê人。」我：「因為我看你kah我仝款佇雲林上車--ah。」後來伊閣講著伊14歲就離鄉做工課，這嘛蹛新北市，有囝有孫，今年拄滿65歲有老人證--ah，坐高鐵半價。

　　我想著一个同事的教示：「袂使干焦佇仝溫層內底鋪文，愛共捌人搝票！」，心內雖然淡薄仔感覺礙虐，提起勇氣共伊問：「拜六公投你會去投票--無？」

　　伊講：「會--ah。」我：「你會按怎頓？」伊看起來有小可仔歹勢，倚來我ê耳空邊，講：「我會頓無同意，ah你leh？」我講：「我嘛是--ah，四个無同意。」伊講：「按呢真好！」
後來閣問伊：「恁孫敢會曉講台語？」我本來感覺伊一定是講袂曉。想袂到，伊講：「會--ah，厝--裡的人，大部份攏下港來ê lah，攏有leh講。」

　　後來伊kah我開講到枋橋，雖然本來ê目的是搝票kah推捒台語，兩个攏失敗。猶毋過我感覺拄著有仝款想法ê人嘛是真歡喜！