恁kánn-ná外國囡仔

《恁kánn-ná外國囡仔》
下跤有中國文翻譯

　　Tshuā囡仔去台北美術館，阮規路uì買票開始全程講台語，其實tō kah平常時仔仝款。招呼ê服務人員真親切，阮mā看kah真歡喜。

　　到一站beh看萬花筒，排隊tio̍h阮ê時陣，導覽人員雄雄kā阮講「恁kánn-ná外國囡仔--leh，lóng聽無中文。」

　　我聽tio̍h tshuah 1 tiô，一時m̄知beh按怎kā應。等待伊介紹了，阮行離開ê時陣，我kā伊講「Tī台灣講台語tō若像外國人！？」

　　伊凡勢發覺伊講話無經過大腦，應該心內mā無歹意。趕緊講伊感覺按呢kah囡仔講台語真好，邊仔幾个導覽人員年紀lóng差不多50幾歲--ê，mā圍倚來講，以前做學生講台語是會hőng罰。伊無kah伊ê兩个囡仔講台語，tsit-má in講台語lóng若像外省人（tàu正名：1949後ê中國移民）。In koh呵咾我台語講kah真好勢（5年前我絕對想袂到我mā有這工）。

　　是有淡薄仔悲哀，啥物時陣講家己ê本土語言，而且是上大族群ê母語台語，變做是親像外國人--ah？

中國文翻譯：
《你們好像外國小孩》

　　帶小孩去台北美術館，我們從頭到尾，從買票開始全程講台語，其實就跟平常一樣。招呼的服務人員很親切，我們也看得很高興。

　　到其中一站看萬花筒，排隊到我們的時候，導覽人員忽然對我們說「你們好像外國小孩喔，都聽不懂中文。」

　　我聽到嚇一跳，一時不知道要怎麼回他。等他介紹結束，我們走出去的時候，我對他說「在台灣講台語就像外國人！？」

　　他可能發覺自己講話沒經過大腦，應該也不是故意的。趕緊說他覺得這樣跟小孩講台語很好，旁邊幾個導覽人員年紀都差不多50幾歲，也圍過來說，以前做學生講台語會被罰。他沒跟兩个小孩講台語，現在講台語都像外省人（幫正名：1949後的中國移民）。他們又稱讚我台語講得很好（5年前我絕對想不到我也有這天）。

　　是有一點悲哀，什麼時候講自己的本土語言，而且是最大族群的母語台語，變成是像外國人呢？

台羅拼音隨機顯示

隨機產生台羅拼音

針tu̍h心臟

 　　Tī我做小兒心臟科訓練醫師ê時陣，台灣爭取著一个機會，tī阮病院主辦一場國際心導管示範大會。Hit年我猶是菜鳥仔，知影ê無kài濟，kan-na hőng分配去綴其中一台做第二助手。

　　病人是一个五六十歲ê阿伯，進前動心臟手術（破胸破心）kā二尖瓣換做一粒鐵仔ê。無奈何手術ê時陣，鐵瓣膜hām人體組織紩無bā，致使瓣膜ê邊仔有tsiânn濟破空，會漏血。病人一直有心衰竭（sim-sue-kia̍t）ê症頭，不時仔就會喘。為著這个問題，伊bat接受心導管治療，想beh用窒仔kā破空窒--起來，毋過因為路徑siunn彎曲，致使管仔無法度穿過破空，尾手失敗。

　　這táu khah特別ê所在，是有邀請真濟國際大師來台灣示範，做主刀醫生，mā趁這个機會hōo逐家交流，互相參詳討論。阮原底ê計畫是：kah心臟外科合作，kā胸坎仔破開，看著心臟以後，順上直ê路線用針tu̍h--入去，按呢穿過破空ê機會上懸。有kā胸坎仔破開，mā毋免驚流血，nā有就用線紩起來就好。

　　負責阮這台ê是Z大師，伊聽了阮ê計畫就講：毋免外科，我家己來就好。伊請麻醉科hōo已經插管ê病人吐氣了暫停欶氣，hōo肺部kiu起lih上頂懸，看超音波確定倒心室心尖ê所在，就用長koh幼ê針uì胸坎仔tu̍h--入去。台仔頂ê助手kah邊仔ê觀眾lóng毋敢振動。一直到針ê尾溜有鮮紅ê血綴脈搏一陣一陣噴--出來，koh kā一條鐵線成功穿過破空，逐家心肝頭tsiah放khah輕鬆。

　　問題來--ah。破空窒了，nā是kā管仔挽出來，心臟ê壁就有一空。倒心室內底壓力tsiok大，血會用噴--ê。而且直接uì胸坎仔tu̍h--lueh，內底無可能紩。Z大師真熟手，看伊就用一粒ná像草窒仔ê人工金屬窒仔，拄拄仔好囥tī心室壁內底，bā-bā-bā。隨就解決這个問題。

　　Hit pái是我到tann唯一pái看過ê針tu̍h心臟。Z大師真正是「老ê老步定」、「刀利毋驚狗頭大」。教科書內底寫ê雄雄出現tī面頭前，hőng看現現。親身經歷過ê就算經過偌濟冬lóng無可能放袂記。

台羅ê kha̋ng-páng

　　Tsa̋ng佇虎尾予朋友請食薑母鴨，仝一桌坐邊仔--ê是一个家醫科醫師，煞場ê時陣阮嘛做伙行去開車。行--leh行--leh，就影著路邊一間手摵飲料店ê kha̋ng-páng寫「KUÓ-Ì」，我就共伊講這若像是leh寫台文拼音ê款，猶毋閣唸出來毋知影leh講啥。

　　伊講台文拼音若像是天書。我隨講袂--ah，我最近去考教育部ê台語檢定有過neh。伊看起來足驚疑，問我是毋是本底就台語足gâu。我就隨轉做台語，講其實三年前我台語足袂輾轉。是因為驚台語欲失傳--ah，才下決心一定愛共家己ê母語講倒轉來，而且kah囡仔（這馬兩歲）是全台語講話。

　　伊有淡薄仔憢疑ê問我，囡仔兩歲台語足輾轉？我講這哪有啥物好奇怪--ê，你對伊講啥伊就講啥，擲伊去彼个環境，偌困難ê語攏毋是問題。兩歲囡仔會曉講華語（只要有人對伊講）就仝款會曉講台語。

　　閣有講超過十分鐘，嘛解說台語羅馬字就是若像學華語愛學注音，這是上基本--ê，才會予你查字典kah書寫ê能力。最後，伊講本來伊對台語羅馬字足排斥--ê，經過我講，感覺會當去學看覓。

　　希望是會當閣減一个母語青盲牛（文盲）。

高鐵坐邊仔ê阿伯

　　我坐高鐵對雲林轉來，邊仔坐一个生份ê阿伯，仝款對雲林上車。佇路中伊提伊ê手機仔共我問：「你看遮冷氣ê防塵蓋寫$290是台票抑是美金？」我斟酌看--一下，共講：「這應該是台票--lah，若是美金就足貴--ooh。」過一站仔，伊閣問：「Ah這leh？寫$95.6是台票抑是美金？」我講：「台票--lah，美金就一領褲3000箍--neh。」伊講：「佇網路買物件--hooh，這少年仔才會曉，阮老歲仔毋捌--lah。」

　　我看伊攏講台語，嘛感覺伊趣味趣味，就共問：「你敢雲林人？」伊講：「你哪會知影？我是東勢彼爿ê人。」我：「因為我看你kah我仝款佇雲林上車--ah。」後來伊閣講著伊14歲就離鄉做工課，這嘛蹛新北市，有囝有孫，今年拄滿65歲有老人證--ah，坐高鐵半價。

　　我想著一个同事的教示：「袂使干焦佇仝溫層內底鋪文，愛共捌人搝票！」，心內雖然淡薄仔感覺礙虐，提起勇氣共伊問：「拜六公投你會去投票--無？」

　　伊講：「會--ah。」我：「你會按怎頓？」伊看起來有小可仔歹勢，倚來我ê耳空邊，講：「我會頓無同意，ah你leh？」我講：「我嘛是--ah，四个無同意。」伊講：「按呢真好！」
後來閣問伊：「恁孫敢會曉講台語？」我本來感覺伊一定是講袂曉。想袂到，伊講：「會--ah，厝--裡的人，大部份攏下港來ê lah，攏有leh講。」

　　後來伊kah我開講到枋橋，雖然本來ê目的是搝票kah推捒台語，兩个攏失敗。猶毋過我感覺拄著有仝款想法ê人嘛是真歡喜！

先天性心臟病佮有身孕

　　最近武漢bú-hàn肺炎hì-iām疫情i̍k-tsîng嚴重，尤其佇北部四界湠thuànn。雖然佇雲林看門診，壓力相對無遐爾hia-nī大，為著驚萬不二bān-put-jī，嘛是穿隔離衣keh-lī-i共規身軀包包起來，戴手術帽仔佮面罩bīn-tà。若毋是佇特殊時期，囡仔看著應該會感覺拄著機器人，大人看著應該會感覺拄著痟的。

 　　前一站仔，有一對翁仔某鬥陣來我的門診。某是先天性心臟病的患者，細漢時心臟有開刀，閣換一个鐵仔的人工瓣膜bān-mo̍oh。

　　人工瓣膜有兩種，鐵仔的佮生物組織tsoo-tsit的（牛、豬）。鐵仔的瓣膜會當用較久，但是畢竟pit-kìng是金屬kim-sio̍k，毋是生物體的物件，較gâu生血角hueh-kak，愛照起工食抗凝血gîng-hueh的藥仔。一般是ua-huá-lín／warfarin這類的，藥理作用是對抗bi-tá-bín／vitamin K，所以一寡深青色的菜蔬袂使食傷濟，無會影響抗凝血的效果。這款藥仔有致畸胎kî-thai性，有身的時陣袂當食。

　　In問的就是想欲有身生囝的問題。有的醫師直接講「莫生啦！」，有的講對有身時陣用的藥仔無經驗，捒in去婦產科，後來閣去問風溼hong-sip免疫科。In原仔uân-á感覺袂放心，佇網路頂揣著遮有咧看成人先天性心臟病，就來掛號矣。

　　我講：「換鐵仔的人工瓣膜毋是絕對袂使有身孕，但是過程會較辛苦。本底咧食抗凝血的ua-huá-lín／warfarin愛改做注皮下phuê-hā的低分子hun-tsúhi-phá-lín／heparin（low molecular weight heparin），佮注胰島素î-tó-sòo的方式相siāng。藥仔是一支貯好佇射筒內底，欲注偌濟會當照處方家己節。」

　　先天性心臟病治療的效果愈來愈好，以前感覺出世袂活的病，這馬足濟攏活到大漢，佮別人仝款做工課，無講根本就看袂出來，甚至有身生囝。

　　講袂使上簡單上無責任，毋閣咱應該愛照證據講話。按照世界衛生組織對先天性心臟病閣有身的危險分類，有第一到第四級。其中第一級上安全，第四級是「無建議有身」，有換人工金屬瓣膜是第三級，有身的時陣應該愛每一兩個月轉來門診檢查，生產嘛上好愛佇有專家的中心較安全。

 

關連佮因果

 　　「聽講注了武漢肺炎bú-hàn-hì-iām預防射，足濟老人生狂死tshenn-kông-sí！」

　　「新聞講注了預防射飼母奶，結果嬰仔暗暝àm-mê就袂喘氣矣。」

　　武漢肺炎疫情期間，上無欠缺khiàm-khuat的毋但m̄-nā有一寡仔大欉嬰仔咧枵飽吵iau-pá-tshá，猶閣有不止仔濟的流言liû-giân。雖然斟酌tsim-tsiok想一下嘛知影這是有心人iú-sim-jîn刁故意咧共人嚇驚hennh-kiann，製造tsè-tsō社會動亂tōng-luān。毋閣新聞媒體綴tuè咧報，逐家看甲霧嗄嗄bū-sà-sà，毋知到底是真抑是假。

　　佇科學領域kho-ha̍k-líng-i̍k，「關連kuan-liân（association）」佮「因果in-kó（causation）」兩个詞是無仝的。舉例講，好額人hó-gia̍h-lâng，啉lim進口紅酒的比例比散赤人sàn-tshiah-lâng較濟。敢會當講啉進口紅酒才會趁thàn大錢？當然毋是！是因為有錢有閒才有法度買貴參參kuì-som-som的酒。「啉酒」佮「好額」有「關連」，但是無「因果」。

　　講倒轉來，有一站仔會有較濟注射以後幾工以內就死去的新聞，是因為彼陣攏是注年歲較大，75到85歲以上的序大人sī-tuā-lâng。這馬台灣人平均壽命pîng-kun-siū-miā差不多就是八十幾歲，一工注幾萬人，有幾十个注了就往生óng-sing嘛無稀罕hi-hán。若是真正欲討論注預防射佮死亡的因果關係，應該愛比較「有注射的人的死亡率lu̍t」佮「無注的人的死亡率」是毋是仝款，這也是藥品審查sím-tsa的時陣愛分實驗組si̍t-giām-tsoo佮對照組tuì-tsiàu-tsoo的理由。

　　藥品審查攏真嚴格giâm-keh，兩組比較，閣袂用得bē-i̋ng予人知影伊注的是啥物。若是知影，試驗會有精差。譬如講，病人知影是注真正的藥仔，伊會特別注意身體無爽快的症頭，尾仔統計副作用hù-tsok-iōng的比例可能就較懸。咱嘛會使參考國產高端kok-sán ko-tuan預防射的試驗報告，注安慰射an-uì-siā（生理鹽水）的志願者tsì-guān-tsiá，足濟攏會落屎、頭疼。理論上，注生理鹽水無可能會造成這款症頭。這就是「反安慰劑效應huán-an-uì-tse-hāu-ìng（nocebo effect）」。所以新藥上市tsiūnn-tshī的試驗，要求愛「雙盲siang-bông（double blind）」：開藥仔的醫師、病人攏毋知；甚至「三盲sann-bông（triple blind）」：毋但醫師、病人，做分析統計hun-sik-thóng-kè的人嘛毋知（干焦kan-na知影是兩組）。按呢過程才會公平，結果才可信。

　　上落尾，嬰仔絕對袂使睏枕頭！尤其是猶袂曉反身píng-sin的嬰仔，若是鼻仔佮喙予枕頭仔崁牢khàm-tiâu咧，可能就會予翕死hip--sí。